«Արմենպրես»-ի փոխանցմամբ՝  «Պանարմենիան էքսպո 2023» 15-րդ հոբելյանական միջազգային բազմաբնույթ ցուցահանդես-ֆորումի պաշտոնական բացման արարողությունը կայացավ հոկտեմբերի 6-ին Երևանում:

 

Էքսպոյին ներկայացված են ընկերություններ Հայաստանից, Ռուսաստանից, Վրաստանից, Գերմանիայից, Իրանից ու Ղազախստանից: Ընկերությունները գրեթե բոլոր ոլորտներից են՝ ավտոարտադրողներից մինչև տեքստիլ արդյունաբերության, սննդի արդյունաբերության և այլ ոլորտների ներկայացուցիչներ: Բացառություն է բարձր տեխնոլոգիական արդյունաբերության ոլորտը:

 

«Պանարմենիան էքսպո»-ն ստեղծվել է 2003 թվականին «Սփյուռք-Հայաստան» տնտեսական համաժողովի շրջանակներում: Գերնպատակն է եղել մեկ հարթակում հավաքել Հայաստանի բոլոր ոլորտների արտադրական ներուժը: 2009 թվականից հետո ֆորմատը փոխվեց միջազգայինի, այսպիսով` կարող են մասնակցել ընկերություններ՝ բոլոր երկրներից: Այս ընթացքում մասնակցել են տարբեր երկրներից՝ ԱՄԷ-ից, Չինաստանից, Լեհաստանից և այլն»,-ասաց «Պրոմ Էքսպո» ընկերության հիմնադիր տնօրեն Արման Զաքարյանը

 

 

Այժմ ցուցահանդեսի շրջանակներում տնտեսավարողները ունենում են նաև B2B հանդիպումներ: Հայաստանի գործարարները հանդիպումներ են ունենում արտերկրից եկած պատվիրակությունների հետ՝ գտնելու համագործակցության եզրեր՝ արտահանման և ներմուծման ուղղություններով: Զաքարյանը հայտնեց՝ եղել են տարիներ, որ իրենց թիմը սեփական միջոցներով գնորդներ է հրավիրել տարբեր երկրներից, որ գան, տեսնեն հայ տնտեսավարողների արտադրանքը:

 

«Մարդը կարող է շատ լավ գաղափար ունենալ, ստեղծել որակյալ արտադրանք՝ ոչ մեծ արտադրական ծավալներով, բայց դա պետք է ընդլայնվի ու շուկա մտնի՝ մրցակցելու համար: Դրա համար պետք է կամ լավ գործընկեր, կամ լավ ներդրող: Մենք ստեղծում ենք հարթակ, որտեղ այդ ամենը կարելի է գտնել: Ցուցահանդեսի շրջանակում ստեղծված կապերը միշտ ավելի կայուն են լինում»,-ասաց Զաքարյանը:

 

Էկոնոմիկայի նախարար Վահան Քերոբյանը նշեց՝ ստեղծված դժվար իրավիճակը միայն պետք է խթանի ավելի շատ աշխատելու, ավելի շատ ջանքեր ներդնելու համար՝ հաղթահարելու երկրի առջև ծառացած մարտահրավերները: «Տնտեսությունն ամենակարևորն է, որ պետք է անխափան աշխատի, որ կարողանանք մեր մյուս բոլոր հարցերը լուծել»,-ասաց Քերոբյանը:

 

Նա շնորհակալություն հայտնեց, որ չնայած դժվարին իրավիճակին, ջանք է գործադրվել, որ ցուցահանդեսը պատշաճ կերպով անցկացվի: Նախարարը ընկերություններին մաղթեց նոր պայմանագրեր, նոր հարաբերություններ ու բարձր առևտուր: «Վստահ եմ՝ բոլորս ամեն ինչ կանենք, որ տնտեսական բարձր աճը պահպանենք նաև հետագա ամիսների և տարիների ընթացքում»,-նշեց Քերոբյանը:

 

Ցուցահանդեսին ներկայացված՝ անկողնային հավաքածուներ, սրբիչներ ու տնային հագուստներ արտադրող ընկերություններից մեկն իր գործունեությունը սկսել է ընդամենը 4 ամիս առաջ:  «Մենք աշխատում են օնլայն, չունենք խանութ, այս պահին ինչ-որ տեղ ներկայանալու հնարավորություն, էքսպոն լավագույն տարբերակներից է ճանաչելիություն ձեռք բերելու համար: Սա նախ որպես գովազդի, ապա վաճառքի հնարավորություն է»,-ասաց ընկերության ներկայացուցիչ Էմմա Մեսրոպյանը:

 

Էքսպոյի շրջանակում արդեն համագործակցության պայմանավորվածություն են ձեռք բերել: Սրբիչի կտորները, որոնք մինչև այժմ ներմուծում էին, այսուհետ կարող են ձեռք բերել այլ տնտեսավարողից:

 

Ցուցահանդեսին այս տարի ներկայացված են ռուսական 21 ընկերություններ: Հայաստանում ՌԴ առևտրային ներկայացուցիչ Աննա Դոնչենկոն նշեց, որ հոբելյանական ցուցահանդեսի արդյունքների մասին կարելի է դատել ներկայացված ռուսական ընկերությունների քանակից: Դոնչենկոն հայտնեց, որ կլոր սեղան-քննարկում է լինելու, որտեղ քննարկելու են, թե ինչպես ընկերությունները կարող են դուրս գալ շուկա, առկա խնդիրները, որոնց ընկերությունները բախվում են, բիզնես միջավայրը և այլ հարցեր: 

 

Չոր և թաց անձեռոցիկներ արտադրող հայկական ընկերություններից մեկը ցուցահանդեսին մասնակցում է արդեն 5-րդ տարին: Նախորդ էքսպոների շրջանակում ձեռք են բերել պայմանավորվածություններ,և հենց դրանց շնորհիվ այս տարվանից արտահանում են իրականացնում Վրաստան, 2024-ից կարտահանեն նաև Ռուսաստան: «Էքսպոներն օգնում են ճանաչելիության բարձրացման և նոր գործընկերներ գտնելու հարցում: Բարձր եմ գնահատում նման միջոցառումների կազմակերպումը և մշտական մասնակցում ենք»,-ասաց ընկերության ներկայացուցիչ Նարեկ Աջամյանը:

 

Թեև ցուցահանդեսը դեռ նոր է սկսվել, սակայն մասնակից ընկերություններն ասում են, որ արդեն համագործակցության համաձայնությունների են եկել:  Ցուցահանդեսը բաց կլինի հոկտեմբերի 6-ից մինչև հոկտեմբերի 8-ը ներառյալ: